[ئەنگلىيە «كۈندىلىك تېلېگراف گېزىتى»نىڭ 27-سېنتەبىر خەۋىرى] دولان قويىنى باققۇچىلار: ھازىر دۇنيادا پەقەت 1000 دانە دولان قويى بار. بۇ قوينىڭ بەدەن ئالاھىدىلىكى ئۆزگىچە بولغاچقا، جۇڭگودىكى كاتتا بايلارنىڭ ئەرمەك ھايۋىنى بولۇپ قالدى، دېدى.
شىنجاڭنىڭ ئاقسۇ رايونىدىكى 48 ياشلىق دولان قويى باققۇچى ليۇ فېڭخۇا: «چوڭ خوجايىنلار ئېسىل ئاپتوموبىللارنى ھەيدەپ بۇ يەرگە كېلىپ، قوينى ئاپتوموبىلنىڭ كەينى ئورۇندۇقىغا سېلىپ ئېلىپ كېتىدۇ»، دېدى.
ئۇ يەنە: «بۇ خوجايىنلارنىڭ ھەممىسى قوي بېقىپ بېيىغان ئۇيغۇرلار بولۇپ، ئۇلار قىممەت قوينى ئەرمەك ھايۋان قىلىۋالىدۇ»، دېدى.
دولان قويىنىڭ تۇمشۇقى بۈركۈتنىڭكىدەك ئېگىز، ئىلمەك، قۇلىقى ئۇزۇن كېلىدۇ. قەشقەر رايونىدا بېقىلىدىغان دولان قويى ئەسلىدە كىشىلەر يېتىشتۈرگەن تېز چوڭ بولىدىغان قوي بولۇپ، كېيىن ئەرمەك ھايۋان بولۇپ قالدى.
ليۇ فېڭخۇا: «دولان قويىنىڭ باھاسى ئۇنىڭ نەسىلىگە باغلىق، قوينىڭ يۇڭى قاپقارا، قولىقى چوڭ، ئىلمەك بۇرنى قانچە ئېگىز بولسا شۇنچە ياخشى. ئەڭ ياخشى دولان قويىنىڭ بەدىنى قارا، قۇيرۇقى ئاق بولىدۇ»، دېدى.
ئۇ يەنە: دولان قويى ئالتە ئايدىلا يېتىلىپ، ئېغىرلىقى 200 قاداق(تەخمىنەن 90 كىلوگىرام)غا يېتىدۇ، دېدى.
ھازىر باھاسى ئەڭ يۇقىرى دولان قويى قەشقەردىكى مىجىت ئابدۇرېھىم باققان ئالتە ياشلىق قوي. مىجىت: ئىلگىرى بىرى 14 مىليون يۈەن باھا قويۇپ، بۇ قوينى سېتىۋالماقچى بولدى، لېكىن سېتىشقا كۆزۈم قىيمىدى، دېدى.
ليۇ فېڭخۇا: «بۇ قوي ئەڭ ياخشى نەسىللىك قويلارنىڭ بوۋىسى. مەندە ئۇ قوينىڭ بىر نەۋرىسى بار، باھاسى 6 مىليون يۈەن ئەتراپىدا. مەن جەمئىي 19 دولان قويى بېقىۋاتىمەن، ئۇلارغا چىلان، ياڭاق ۋە يۇمران ئوتلارنى بېرىمەن»، دېدى.
دولان قويىنى باققۇچىلار: بىز دائىم بىرنەچچە ئائىلىلىك بىرلىشىپ مەبلەغ چىقىرىپ بىر دولان قويىنى سېتىۋالىمىز، ئاندىن نەسىللەندۈرۈش ھەققى يىغىمىز. ئەڭ ياخشى دولان قويىنىڭ ھەربىر قېتىملىق نەسىللەندۈرۈش ھەققى 300 مىڭ يۈەن، دېدى.
ليۇ فېڭخۇا: «بۇلتۇر ئۆزۈم باققان 320 تۇياق ئادەتتىكى قوينى سېتىۋەتتىم. لېكىن بۇ پۇل بىر دولان قويى سېتىۋېلىشقىمۇ يەتمەسلىكى مۇمكىن. مەن 2009-يىلىدىن باشلاپ دولان قويى باقتىم، ئەينى ۋاقىتتا 25 مىڭ يۈەنگە بىر جۈپ دولان قويى سېتىۋالغانىدىم، كېيىنكى يىلى بىرى 250 مىڭ يۈەنگە ئالماقچى بولدى، ھەزىر باھاسى تېخىمۇ ئېشىۋاتىدۇ»، دېدى.
