[مېكسىكا «مىڭ يىل» گېزىتىنىڭ 27-سېنتەبىر خەۋىرى] ئىتالىيەدىكى ئوڭ قاناتلار ئەمدى بېرلۇسكونىنىڭ ئىستېپا بېرىشىنى مۇزاكىرە قىلىشتا چەكلىمىگە ئۇچرىمايدۇ. ئىتالىيەنىڭ 75 ياشتىن ئاشقان بۇ زۇڭلىسى ئوڭ قاناتلارنىڭ پۇتىغا پۇتلاشقان چۇماق بولدى، گەرچە ئومۇمىي سايلام 2013-يىلى ئۆتكۈزۈلىدىغان بولسىمۇ، ئۇلار ئۇنى قوللاش نىسبىتىنىڭ چۈشۈپ كېتىشىنىڭ ئۆزلىرىگە تەسىر كۆرسىتىشىدىن ئەندىشە قىلىۋاتىدۇ. مۇشۇ ئايدا ئېلان قىلىنغان تەكشۈرۈش نەتىجىسىدىن مەلۇم بولۇشىچە، ھازىر بېرلۇسكونىنى قوللاش نىسبىتى %24 كىمۇ (2008-يىلى 6-ئايدا %64 كە يەتكەن)يەتمەيدىكەن، ئىتالىيەدىكى سايلىغۇچىلارنىڭ سول قاناتلارنى قوللاش نىسبىتى %44 بولۇپ، ئوڭ قاناتلارنى قوللاش نىسبىتى %37.5 ئىكەن.
    سىياسىي ۋەزىيەت ناچار بولغاندىن باشقا، بېرلۇسكونى ئۆزىمۇ سەتچىلىككە چېتىلىپ قالدى، ئۇ رەھبەرلىك قىلىۋاتقان دۆلەتمۇ تېخى ئاشكارىلانمىغان پۇل مۇئامىلە كىرىزىسىگە پېتىپ قالدى.
    بېرلۇسكونى ھازىر ئىككى تەرەپتىن كىرىزىسكە دۇچ كەلدى: ئىتالىيەلىكلەر ئۇنىڭ ھۆكۈمىتىگە ئىشەنمەيدىغان بولدى، بازارلار ۋە ياۋروپا ئورگانلىرىمۇ ئىتالىيەگە ئىشەنمەس بولدى. ئۇنىڭ ناچار نامى دۆلەتنى كىرىزىسكە پاتتۇرۇپ قويدى. «جۇمھۇرىيەت» گېزىتىدە ياۋروپا پارلامېنتىدىكى ئىسمىنى ئاشكارىلىمىغان بىر ئەربابنىڭ سۆزىدىن نەقىل كەلتۈرۈلۈپ: «ئىتالىيەنىڭ ئۆزىدە مەسىلە يوق، مەسىلە ئۇنىڭ باشلىقىدا»، دېيىلدى. 
    سول قانات ئەربابلارلا ئەمەس، بېرلۇسكونى قاراشلىق ئوڭ قاناتلار لاگېرىدىكىلەرمۇ بېرلۇسكونىنىڭ ئىستېپا بېرىشىنى تەلەپ قىلىۋاتىدۇ.