[ئىسپانىيە «دۆلەت گېزىتى»نىڭ 27-سېنتەبىر خەۋىرى] سۇرت كازافىنىڭ يۇرتى ھەم كازافىنى قوللىغۇچىلارنىڭ ئۇۋىسى بولۇش بىلەن نام چىقارغان. كازافى ھۆكۈمرانلىق قىلغان 42 يىلدا بۇ جاي نامسىز كىچىك پورت بازىرىدىن 100 مىڭ نوپۇسقا ئىگە ئاۋات شەھەرگە ئايلانغان. ھازىر ئۇ جاي ئۆكتىچىلەر ۋە ش ئا ئە ت نىڭ مۇھاسىرىسىدە قالغاچقا، نۇرغۇن كىشى قوراللىق ئۆكتىچىلەرنىڭ ھىمايىسىدە قېچىۋاتىدۇ. ئۇلارنىڭ سۆزى بويىچە ئېيتقاندا، بۇ شەھەر قاتتىق ۋەھىمە ئىچىدە قالغان. 
    بىر مۇساپىر: «چوڭ ئىمارەتلەرنىڭ ھەممىسى دېگۈدەك ۋەيران بولدى»، دېدى. پەلەستىنلىك ئەۋلادىدىن بولغان لىۋىيەلىك سەمى دېلامان: «ئۆكتىچىلەر چۈشتىن بۇرۇن سائەت 11دىن كەچ سائەت 7گىچە ھۇجۇم قىلدى، لېكىن ئەڭ ئوسال يېرى شۇكى، ش ئا ئە ت نىڭ بومباردىمانى دائىم كەچ سائەت 11 دە باشلىنىدۇ. ئىمارەتلەرنىڭ ھەممىسى ۋەيران بولغان بولۇشى مۇمكىن. ئىككى كۈندىن بۇيان بومباردىمان ئالتە سائەت داۋاملىشىۋاتىدۇ. بالىلار، ئاياللار ۋە ئەرلەرنىڭ ھايۋاندەك ئۆلۈپ كېتىۋاتقانلىقىنى كۆردۈم. ئۆيۈمدىكىلەرنى گەمىگە يوشۇرۇپ قويۇپ پۇرسەت تېپىپ قېچىپ چىقتىم. توكمۇ، يەيدىغان نەرسىمۇ يوق. يېقىنقى ئالتە ئايدا سۇرتتا 3000 چە كىشى ئۆلدى»، دېدى.
     بىر ئاتا: «بىرلا دوختۇرخانا قالدى، لېكىن دورا يوق دېيەرلىك. قېپقالغانلارنىڭ ھەممىسى ئۆلۈمنى كۈتۈۋاتقانلار ياكى ئاخىرغىچە جەڭ قىلماقچى بولغانلار»، دېدى.