شىنخۇا ئاگېنتلىقىنىڭ لاسۋىگاس 1-ئاينىڭ 9-كۈنىدىكى تېلېگراممىسى، ئامېرىكا مىكروسوفت شىركىتىنىڭ باش ئىجرائىيە ئەمەلدارى سىتىۋ بالمېر 9-چېسلا لاسۋىگاستا ئېچىلغان خەلقئارا ئىستېمال ئېلېكترونى كۆرگەزمىسىدە مۇنۇلارنى ئېلان قىلغان:«يېڭى بىر ئەۋلاد Windows مەشغۇلات سىستېمىسى بۇ يىل 2-ئاينىڭ كېيىنكى يېرىمىدا  رەسمىي ئېلان قىلىنىدۇ، بۇ مەشغۇلات سىستېمىسى كەڭ ئابونتلارغا يېڭىچە تۇيغۇ ئېلىپ كېلىدۇ».
بالمېر يەنە مۇنداق دېگەن:« Windows مەشغۇلات سىستېمىسى باشتىن ئاخىرى مىكروسوفت شىركىتىنىڭ يادرولۇق مەھسۇلاتى بولۇپ كەلدى، بىز ھازىرغىچە پۈتۈن يەر شارى مىقىياسىدا 1 مىليارد 300 مىليون دانە Windows مەشغۇلات سىستېمىسى قاچىلانغان شەخس كومپيۇتېرىنى ساتتۇق، Windows 8 بۇ يىل 2-ئاينىڭ كېيىنكى يېرىمىدا رەسمىي ئېلان قىلىنىدۇ».
مىكروسوفىتنىڭ باش سېتىش ئەمەلدارى تامى رۇئېل تونۇشتۇرۇپ مۇنداق دېگەن:« Windows 8 مەشغۇلات سىستېمىسى ئابونتلارغا ئالاھىدە تۇيغۇ ئاتا قىلىشنى مەقسەت قىلىپ لايىھىلەنگەن، ئۇ تاختا كومپيۇتېر بىلەن شەخس كومپىيۇتېرلىرىدىكى مەشغۇلات سىستېمىسىنىڭ ئەۋزەللىكلىرىنى ئۆزىگە مۇجەسسەملىگەن. ئۇ ئابونتلارنىڭ ئارزۇسىنى رېئاللىققا ئايلاندۇرغۇسى!»
يېڭى بىر ئەۋلاد  Windows 8 مەشغۇلات سىستېمىسى AMD ۋە ئېنتىل X86 قۇرۇلما بىر تەرەپ قىلغۇچنى قوللايدىكەن. رۇئېل يەنە نەق مەيداندا Windows 8 مەشغۇلات سىستېمىسىنىڭ ئېچىش زۆرۈر بولمىغان قوللىنىشچان يۇمشاق دېتاللارنىڭ ئۇچۇرلىرىنى كۆرۈش، بەت يۈزىنى قۇلايلىق ئالماشتۇرۇش، كۆپ خىل تىللارنى قوللاش قاتارلىق بىر قاتار ئالاھىدىلىكلىرىنى كۆرسەتكەن.