جۇڭگو ئىراندىن ئىمپورت قىلىنىدىغان نېفىت مىقدارىنى ئازايتتى
قىزىل بايراق ھەربىي ئىشلار تورىنىڭ 12-يانۋاردىكى خەۋىرىگە ئاساسلانغاندا، جۇڭگو فېۋرالدا ئۇدا ئىككىنچى قېتىم ئىران خام نېفىت ئىمپورت مىقدارىنى تۆۋەنلەتمەكچى بولغان بولۇپ، ئىراننىڭ بۇندىن بۇرۇن كۆرۈلۈپ باقمىغان خەلقئارا جازالاش سىياسىتىگە دۇچ كېلىشى بىلەن، جۇڭگو-ئىران ئىككى تەرەپ چىقىم بەلگىلىمىلىرى مەسىلىسىدىكى ھەل قىلىنمىغان ئىختىلاپلار بۇ قارارنىڭ كېلىپ چىقىشىغا سەۋەب بولغان. بېيجىڭدىكى ئىران خام نېفىتى تىجارىتى بىلەن شۇغۇللىنىدىغان تىجارەتچىنىڭ ئېيتىشىچە، جۇڭگو فېۋرالدىمۇ، يانۋاردىكىگە ئوخشاشلا ئىران خام نېفىت ئىمپورت مىقدارىنى تەڭ نىسبەتتە تۆۋەنلىتىدىكەن.
ئىگىلىنىشىچە، جۇڭگو ھۆكۈمىتى يانۋاردا ئەسلىدىكى ئىراندىن ئىمپورت قىلىنىدىغان خام نېفىت مىقدارىنىڭ يېرىمىدىن كۆپرەكىنى ئازايتقان بولۇپ، مۇخبىر يەنە بىر نېفىت سودىگىرىدىن يانۋارنىڭ ئوتتۇرىلىرىدا ئىككى تەرەپنىڭ تەمىنلەش توختامى ئىمزالاش ئېھتىمالىقى بار-يوقلۇقى سورىغاندا، ئۇ بۇنداق ئېھتىماللىقنىڭ يوقلۇقىنى، ئادەتتە يانۋارنىڭ ئوتتۇرىلىرىنىڭ 2-ئايدىكى يۈك قاچىلاشنىڭ ئەڭ ئاخىرقى پەيتلىرى ئىكەنلىكىنى ئېيتقان. ئىگىلىنىشىچە، ئىران جۇڭگونى ئىزچىل ئىككىنچى چوڭ نېفىت ئىمپورت دۆلىتى دەپ قارايدىكەن.
18-يانۋار دېپلوماتىيە مىنىستىرلىكى ئۆتكۈزگەن ئاخبارات ئېلان قىلىش يىغىنىدا، جۇڭگو دېپلوماتىيە مىنىستىرلىكى باياناتچىسى خۇڭ لېي ئامېرىكىنىڭ ئىراننى جازالاش چارىسى ھەققىدە توختىلىپ:«جۇڭگو دۆلەت قانۇنىنى خەلقئارا قانۇندىن ئۈستۈن ئورۇنغا قويۇپ، ھە دېسىلا باشقا دۆلەتلەرگە تاق يۆنىلىشلىك جازالاش تەدبىرىنى يولغا قويىدىغان قىلمىشلارغا قەتئىي قارشى تۇرىدۇ» دېگەن، ئەمما خۇڭ لېينىڭ بۇ سۆزى بىلەنلا تاراتقۇلار جۇڭگو ئىراندىن ئىمپورت قىلىنىدىغان خام نېفىت مىقدارىنىڭ يېرىمىدىن ئارتۇقىنى ئازايتتى، دېگەن خەۋەرنى تارقىتىشقا باشلىغان.
ئىران يادرو مەسىلىسىدە غەرب دۆلەتلىرىنىڭ تەلىپىگە ئىتائەت قىلمىغانلىقتىن، ئامېرىكا ئىراننىڭ جان تومۇرى بولغان نېفىت سانائىتىگە قارىتا ئىمبارگو سىياسىتى يۈرگۈزگەن. ئامېرىكا پرىزدېنتى ئوباما ئالدىنقى ھەپتە ئىران مەركىزىي بانكىسى بىلەن سودا ئالاقىسى ئېلىپ بارغان ھەر قانداق ئىقتىسادىي تەشكىلاتقا قارىتا تېگىشلىك جازا يۈرگۈزىدىغانلىقى توغرىسىدىكى مەزمۇنلاردىن تەشكىل تاپقان يېڭى جازالاش لايىھىسىنى ئىمزالىغان بولۇپ، بۇ ئامېرىكىنىڭ نېفىت ئىشلەپچىقىرىشىنى ئازايتىش ئارقىلىق، ئىران يادرو پىلانىنى توختىتىش ئۈچۈن يولغا قويغان ئەڭ يېڭى چارىسى ھېسابلىنىدىكەن.
ئامېرىكىنىڭ بېسىم ئىشلىتىشى ۋە كۈشكۈرتىشى ئارقىسىدا، ئامېرىكا ۋە غەرب ئەللىرى ئىراننى جازالاشتا بىردەك پىكىر ھاسىل قىلغان بولۇپ، ئوباما ئىراننى جازالاشتىكى يېڭى تەدبىرىنى ئېلان قىلىپ ئۇزۇن ئۆتمەي، ياۋرۇپا ئىتتىپاقىمۇ ئىرانغا نېفىت ئىمبارگوسى يۈرگۈزۈشتە، پرىنسىپ جەھەتتە ئورتاق قاراش ھاسىل قىلغانلىقىنى، يانۋارنىڭ ئاخىرلىرىدىن باشلاپ، ئىمبارگو سىياسىتىنى رەسمىي يۈرگۈزىدىغانلىقىنى جاكارلىغان. بۇندىن بۇرۇن، غەرب ئىمبارگو سىياسىتىنى يۈرگۈزۈش-يۈرگۈزمەسلىك ھەققىدە كېڭەش ئېلىپ بېرىۋاتقاندىلا، ياپۇنىيە ئامېرىكىنىڭ نېفىت ئىمبارگوسى تەلىپىنى رەت قىلغانلىقتىن، ئىككى دۆلەت ئوتتۇرىسىدا ئىران مەسىلىسى ھەققىدە ئىختىلاپ كۆرۈلگەنىدى.
ئامېرىكىنىڭ ئىرانغا قارىتا نېفىت ئىمبارگوسى يۈرگۈزۈشى ۋە باشقا دۆلەتلىرىنى ئىران مەركىزىي بانكىسى بىلەن ئالاقە قىلىشىدىن توسۇشى قاتارلىق يېڭى-يېڭى جازالاش تەدبىرلىرىنىڭ مەيدانغا كېلىشى بىلەن، ئامېرىكا ۋە ئوتتۇرا شەرق زىددىيىتى تېگىپلا كەتسە پارتلاپ كېتىدىغان ھەلقۇمغا بېرىپ قالغان. ئامېرىكا ۋە ياۋرۇپا ئىتتىپاقى ئىراننى جازالاشتىكى يېڭى تەدبىرىنى كۈچەپ يولغا قويۇۋاتقان مۇشۇنداق پەيتتە، جۇڭگونىڭ ئىراندىن ئىمپورت قىلىنىدىغان نېفىت مىقدارىنى زور نىسبەتتە ئازايتىشى، ئامېرىكىنىڭ ئىرانغا قارىتا ئۇرۇش قوزغاش نىيىتى بارلىقىنى ئاشكارىلاش بىلەن بىللە، جۇڭگونىڭ ئىران نېفىتىگە بولغان بېقىنىشنىڭ بىر ئاز بولسىمۇ ئاجىزلىغانلىقىنى، ئەڭ مۇھىمى، جۇڭگونىڭ ئىران مەسىلىسىدىكى مەيدانىدا ئۆزگىرىش بولۇۋاتقانلىقىنى ئەكس ئەتتۈرگەن.
