ئامېرىكا فوربېس ئاخبارات تورىدا 17- يانۋار «جۇڭگو بايلىرى ئامېرىكا ئۆي- زېمىن كەسپىدىكى مەسىلىنى ھەل قىلالامدۇ؟» دېگەن تېمىدا ماقالە ئېلان قىلىندى، ماقالىدە مۇنداق دېيىلدى: بۈگۈن چۈشتىن بۇرۇن جۇڭگونىڭ ئىقتىسادىي ئېشىشىغا ئائىت سانلىق مەلۇماتتىكى ئۇچۇرلار مەبلەغ سالغۇچىلار مۆلچەرلىگەندەك ئۇنداق ئوسال بولمىدى. ئەمما مەن يېقىندا شياڭگاڭ ۋە سىنگاپورغا بارغاندا مۇنداق بىر قىزىقارلىق مەسىلىنى بايقىدىم، يەنى جۇڭگودىن ئىبارەت كىشىنىڭ ئىشەنگۈسى كەلمەيدىغان چوڭ ئىقتىسادىي دۆلەتتىكى كاپىتال سىرتقا ئېقىۋېتىپتۇ.
شياڭگاڭ جۇڭگو قوينىغا قايتىپ كېلىشتىن ئىلگىرىلا، شياڭگاڭدىكى كاپىتال سىرتقا ئېقىشقا باشلىغانىدى. ئەمما ئەڭ ئوسال ئەھۋال يۈز بەرمەيدىغان كەلگۈسىنىڭ بارغانسېرى ئايدىڭلىشىشىغا ئەگىشىپ، چەتئەلگە ئېقىپ كەتكەن پۇللارنىڭ كاپىتالنىڭ قىسمى يەنە شياڭگاڭغا قايتىپ كەلدى. ئالدىنقى ئايدا، سىنگاپور چەتئەللىك مەبلەغ سالغۇچىلارنىڭ سىنگاپورنىڭ ئۆي- زېمىن بازىرىغا مەبلەغ سېلىشتىكى قىيىنلىق دەرىجەسىنى ئاشۇردى، ئىچكى ئەھۋالدىن خەۋەردار كىشىنىڭ مۇئەللىپكە ئېيتىشىچە، سىنگاپورنىڭ قانۇنىدا ئۆي- زېمىننىڭ باھاسى %30 تۆۋەنلەيدىكەن.
نېمىشقا پۇلدار جۇڭگولۇقلار پۇل- ماللىرىنى جۇڭگودىن يۆتكەپ چىقىپ كېتىشكە شۇنچە خۇشتار؟ بۇنى چۈشىنىش ئانچە تەس ئەمەس. راستىنى ئېيتقاندا تورغا تەشەككۈر بىلدۈرۈش كېرەك، تور ئاشۇ پۇلدار جۇڭگولۇقلارغا دۇنيانىڭ باشقا جايلىرىدا نېمە ئىش يۈز بېرىۋاتقانلىقىنى بىلدۈردى. ئامېرىكا مەملىكەتلىك رادىئو ئىستانسىسىنىڭ «ئەتىگەنلىك خەۋەرلەر» پروگراممىسىسىدىكى ئۇچۇرغا ئاساسلانغاندا، ئامېرىكىنىڭ ئىللىنويىز شتاتى پۇلدار بايلار ئامېرىكىدا سالغان مەبلىغى 500 مىڭ ئامېرىكا دوللىرىغا يەتسە، ئۇلارنىڭ ئامېرىكا يېشىل كارتىسىغا ئېرىشەلەيدىغانلىقىنى بىلدۈردى. مۇئەللىپنىڭ قارىشىچە، بۇ ھەقىقەتەنمۇ ھەر ئىككى تەرەپكە پايدىلىق بولغان ئاقىلانە چارە. بۇ ئارقىلىق ئامېرىكا ئىقتىسادىنى جانلاندۇرىدىغان مەبلەغگە ئېرىشىدۇ، پۇلدار جۇڭگولۇقلار بولسا تېخىمۇ بىخەتەر بولغان يەرنى تېپىپ، پۇل- ماللىرىنى ساقلىيالايدۇ.
جۇڭگو مالىيە ئىشلىرى كەسپىدىكى پۇل مۇئامىلە مەسلىھەتچىسى ياڭ ئەپەندى «ئەتىگەنلىك خەۋەرلەر» پروگراممىسىنىڭ زىيارىتىنى قوبۇل قىلغاندا مۇنداق كۆرسەتتى: جۇڭگولۇق مەبلەغ سالغۇچىلارنىڭ ئامېرىكىغا مەبلەغ سېلىشتىكى پايدىسى كۆرۈنەرلىكتۇر. ئامېرىكىدا، مەبلەغ سالغۇچىلار زېمىن ۋە ئۆيىگە ئىگە بولالايدۇ، بۇلارنى يەنە پەرزەنتلىرىگە بېرىشكە بولىدۇ.
جۇڭگودىكى بىر بانكا ۋە خۇرۇن شىركىتىنىڭ دوكلاتىدا بايقىلىشچە، جۇڭگودىكى مىليونېرلارنىڭ %60 تى بىر بولسا چەتئەلگە چىقىپ كەتكەن، بىر بولسا چەتئەلگە چىقىشنى ئويلىشىۋاتقان. ئالدىنقى مالىيە يىلىدا، تەخمىنەن 3000 دەك جۇڭگولۇق باي ئامېرىكىغا مەبلەغ سېلىش يېشىل كارتىسى ئېلىشنى ئىلتىماس قىلغان بولۇپ، 2007- يىلىدىكى 270 كىشىگە سېلىشتۇرغاندا، يىلقىغا %83 لىك سۈرئەت بىلەن ئاشقان.
ئەمما ھازىر، ئامېرىكىدا نۇرغۇن نورمىدىن ئارتۇق ئۆي- زېمىن بار. جۇڭگودىكى كاپىتالنىڭ سىرتقا ئېقىشى ۋە ئامېرىكىدىكى ئۆي- زېمىننى پۇل تۆلەپ قايتۇرۇۋېلىش ھوقۇقىنى يوقىتىش مەسىلىسى (2011- يىلى ئامېرىكىدا 2 مىليون 700 مىڭ پارچە ئۆي- زېمىننى پۇل تۆلەپ قايتۇرۇۋېلىش ھوقۇقىنى يوقىتىش ئىلتىماسى سۇنۇلغان) داۋاملىق كۆپەيمەكتە، بۇ ئىككى مەسىلىنى «تەڭرى قوشقان بىر جۈپلەر» دېيىشكە بولىدۇ.